தொழிலாளர்களின் சம்பளப்பிரச்சினை தொடர்பாக பேசும் போது அதற்கு பதிலளிப்பதற்கு இந்த சபையின் ஆசனங்களில் யாருமில்லை. அவ்வாறிருக்கையில் தமிழர்களின் பிரச்சினை எவ்வாறு தீர்க்கப்படுமென்ற அச்சம் ஏற்பட்டுள்ளதென தமிழ்த் தேசிய கூட்டமைப்பின் யாழ்.மாவட்ட பாராளுமன்ற உறுப்பினர் சி.சிறிதரன் தெரிவித்தார்.
சம்பளச் சபைகள் கட்டளைச் சட்டத்தின் கீழ் ஒழுங்கு விதியை அங்கீகரிப்பதற்கான பிரேரணை மீதான விவாதம் நேற்று வியாழக்கிழமை சபையில் இடம்பெற்றது. இதன்போது உரையாற்றுகையிலேயே அவர் மேற்கண்டவாறு தெரிவித்தார்.
அவர் மேலும் தெரிவிக்கையில், நம் தொழிலாளர்களுக்குரிய சம்பளங்கள் வழங்கப்படாமை, சம்பள வேறுபாடுகள் தொடர்பாக இந்த உயரிய சபையில் எடுத்துக்காட்டுகின்றோம். அதில் காணப்படும் பிரச்சினைகளை முன்வைக்கின்றோம். அதற்குபதிலளிப்பதற்கு யாருமில்லாத நிலையே காணப்படுகின்றது. ஆசனங்களில் பதிலளிப்பதற்கு யாரும் இங்கு இல்லை. எம்மால் பேசப்படும் விடயங்கள் வெறும் பேச்சோடு மட்டும் நிற்காது செயற்பாட்டு ரீதியாக முன்னெடுக்கப்படவேண்டுமென்றே விரும்புகின்றோம். ஆனால் சபையில் அதற்குரிய தீர்வுகளைப் பெறுவதற்கு யாருமில்லை.
அவ்வாறிருக்கையில் தமிழர்களின் பிரச்சினை எவ்வாறு தீர்க்கப்படும் என்ற அச்சம் எழுகின்றது. இதற்கு இது நல்ல உதாரணமாகின்றது என்றார்.இதன்போது தொழில் மற்றும் தொழிற்சங்க உறவுகள் இராஜாங்க அமைச்சர் ரவீந்திர சமரவீர அமைச்சர் மதியபோசனத்திற்கு சென்றிருப்பதால் அவரின் கவனத்திற்கு தான் கொண்டு வருவதாகக் கூறினார்.
