கொக்கிளாயில் சிங்கள மீனவர்கள் அடாவடித்தனம் - கிராம சேவகர்கள் மீது தாக்குதல்!

முல்லைத்தீவு – கொக்கிளாய் பகுதியில் சிங்கள மீனவர்களுக்கும் அப்பகுதி மக்களுக்கும் இடையில் ஏற்பட்ட மோதலைத் தடுக்கச் சென்ற கிராமசேவகர்கள் மீது நேற்றுமாலை தாக்குதல் நடத்தப்பட்டது. சட்டவிரோதமாக மீன்பிடியில் ஈடுபடும் நோக்குடன் கொக்கிளாய் பகுதியில் வாடிகளை அமைப்பதற்காகச் சென்ற முப்பதுக்கும் மேற்பட்ட சிங்கள மீனவர்களுக்கும் கொக்கிளாய் கிராம மக்களுக்குமிடையில் முறுகல் ஏற்பட்டது. இதன்போது சம்பவ இடத்திற்கு பிரதேச மக்களுடன் கிராமசேவகர்களும் சென்றனர்.

இந்தநிலையில் குறித்த சிங்கள மீனவர்களுக்கு ஆதரவான இராணுவத்தினர் என சந்தேகிக்கப்படுபவர்களால் இரண்டு கிராம சேவகர்கள் மீது தாக்குதல் மேற்கொள்ளப்பட்டுள்ளது. தாக்குதலுக்கு இலக்கான கிராம சேவகர்கள் முல்லைத்தீவு பொலிஸ் நிலையத்தில் முறைப்பாடு செய்துள்ளனர். இதனையடுத்து சிங்கள மீனவர்கள் முல்லைத்தீவு பொலிஸ் நிலையத்துக்கு அழைத்துச் செல்லப்பட்டு விசாரணைகள் ஆரம்பிக்கப்பட்டுள்ளது. தாக்குதலுக்கு இலக்கான கிராம சேவகர்களில் ஒருவர் முல்லைத்தீவு மாவட்ட வைத்தியசாலையில் அனுமதிக்கப்பட்டு சிகிச்சை பெற்று வருகிறார். இந்த சம்பவத்தைத் தொடர்ந்து முல்லைத்தீவு மீனவர்கள் மத்தியில் அச்சம் நிலை காணப்படுகிறது.