‘இராணுவமே வெளியேறு’, ‘வலி.வடக்கு மக்களை மீள்குடியேற்றம் செய்’, ‘போர் முடிந்தும் எமக்கு விடிவில்லையா’, ‘ஐ.நாவிற்கு காட்டுவதற்காக ஓரிரு காணியினை விடுவித்து நாடகமாடாதே’ போன்ற கோஷங்களை எழுப்பியவாறும், தம்மை மீள்குடியேற்றம் செய்யுமாறு வலியுறுத்தியும் மக்கள் குறித்த ஆர்ப்பாட்டப் பேரணியை முன்னெடுத்திருந்தனர்.
இதன்போது யாழிலுள்ள ஐக்கிய நாடுகள் வதிவிட காரியாலயத்தில் ஐ.நா மனித உரிமைகள் பேரவையின் ஆணையாளருக்கு அனுப்பி வைக்குமாறு கோரி மகஜர் ஒன்றும் கையளிக்கப்பட்டுள்ளது.
இதனைத் தொடர்ந்து வடமாகாண ஆளுநர் ரெஜினோல்ட் குரே, யாழ்.மாவட்ட அரசாங்க அதிபர் நாகலிங்கம் வேதநாயகன் ஆகியோரிடமும் தமது மீள்குடியேற்றத்தினை துரிதப்படுத்துமாறு மகஜர் கையளிக்கப்பட்டது.
இந்த கண்டன பேரணியில் தமிழ் தேசிய கூட்டமைப்பின் நாடாளுமன்ற உறுப்பினர்கள், மாகாண சபை உறுப்பினர்கள், வடமாகாண சபை எதிர்க்கட்சி தலைவர் உள்ளிட்ட அரசியல் கட்சிகளின் உறுப்பினர்கள் பலரும் கலந்து கொண்டிருந்தனர்.
