19வது திருத்தத்துக்கு ஜேவிபி ஆதரவு!

19 வது திருத்தம் குறித்து தேசிய நிறைவேற்று சபை எடுக்கின்ற தீர்மானத்திற்கு ஜேவிபி ஆதரவு வழங்கும் என அதன் தலைவர் அநுரகுமார திஸநாயக்க தெரிவித்துள்ளார். கட்சியின் தலைமையகத்தில் இன்று நடைபெற்ற ஊடகவியலாளர் சந்திப்பிலே இதனை அவர் தெரிவித்திருந்தார்.

தொடர்நது அவர் கருத்துத் தெரிவிக்கையில் ' அரசியலமைப்பில் மேற்கொள்ளப்பட இருக்கின்ற 19 வது திருத்தம் குறித்து தேசிய நிறைவேற்று சபை எடுக்கின்ற தீர்மானத்திற்கு மக்கள் விடுதலை முன்னணி தமது ஆதரவுகளை வழங்கும். முன்னாள் ஜனாதிபதி மஹிந்த ராஜபக்ஷ தனது அதிகாரத்தை மேலும் வலுப்படுத்திக் கொள்வதற்கு 18 திருத்தத்தினைக் கொண்டுவந்தார். இதன் மூலம் சுதந்திர ஆணைக்குழுக்கள் இல்லாமல் செய்யப்பட்டன. இது பாரிய அதிகார மோசடியாகும். இந்த நிலையில் நிறைவேற்று அதிகார ஜனாதிபதி முறையினை நீக்கி பாராளுமன்றத்திற்கு அதிகாரத்தினைக் கொண்டுவர வேண்டும் என்பதில் மக்கள் விடுதலை முன்னணி கடந்த காலங்களில் பலதரப்பட்ட போராட்டங்களை நடத்தியுள்ளது. தற்போதைய தேசிய அரசாங்கத்தில் 45 இற்கு அதிகமான அமைச்சர்கள் உள்ளனர். ஆனால் புதிய அரசாங்கம் பதவியேற்ற போது அமைச்சர்களின் எண்ணிக்கையை 30 இற்கு மட்டுப்படுத்துவதாக தெரிவித்திருந்தது. இந்த வகையில் கொடுத்த வாக்குறுதிகள் மீறப்பட்டுள்ளன. உயர்நீதிமன்றத்தின் சுயாதீனம் மற்றும் அதியுயர் கௌரவம் என்பன இன்றும் கேள்விக் குறியாகியுள்ளது. 19 வது திருத்தம் தொடர்பில் எதிர்வரும் தினங்களில் பாராளுமன்ற விவாதம் நடைபெறவுள்ள நிலையில் எமது கோரிக்கையினையும் முன்வைக்க விரும்புகின்றோம். அந்த வகையில் நிறைவேற்று அதிகார ஜனாதிபதி முறையினை இல்லாது செய்தல், தேர்தல் முறையில் உள்ள விருப்பு வாக்கு முறையினை இல்லாது செய்தல், தகவல் அறியும் சட்டத்தினைக் கொண்டுவருதல், மேலும் இலஞ்ச மற்றும் ஊழல்களில் ஈடுபடுபவர்களை கைது செய்தல், என்பன குறித்து கவனம் செலுத்தப்பட வேண்டும். இதேவேளை அவங் காட் நிறுவனத்தில் உள்ள குற்றவாளிகளை கைது செய்வதற்கு நடவடிக்கை எடுக்க வேண்டும் எனவும் அவர் குறிப்பிட்டிருந்தார்.