பளைப் பகுதியில் பாரிய கிபிர் குண்டு! - 550 குடும்பங்கள் வீடுகளை விட்டு வெளியேற்றப்பட்டன

பளைப் பகுதியில் உள்ள, வேம்பொடுகேணி கிராம அலுவலர் பிரிவிற்கு உட்பட்ட இந்திராபுரம் பகுதியில் கண்ணிவெடி அகற்றும் பணியில் ஈடுபட்டிருந்த மனிதாபிமான கண்ணிவெடி அகற்றும் பிரிவினரால் 500 கிலோ கிபிர் விமானக் குண்டு நேற்று கண்டுபிடிக்கப்பட்டது. இதையடுத்து இன்று காலை பொலிசாரால் இந்திராபுரம் பகுதியில் இருந்து சுமார் இரண்டு கிலோமீற்றர் சுற்றளவில் உள்ள 550 குடும்பங்கள் வீடுகளை விட்டு வெளியேற்றப்பட்டன.

பின்னர் இன்று மாலை இந்திராபுரம் பகுதிக்கு வருகைதந்த விமானப் படையினர் குறித்த கிபிர் குண்டை சுமார் பத்து அடிக் குழி ஒன்றினைத் தோண்டி அதனுள் வீழ்த்தியே நான்கு மணி ஒரு நிமிடத்திற்கு செயலிழக்க செய்தனர். செயலிழக்கச் செய்யும் பொழுது ஏ-9 வீதியின் போக்குவரத்து முகமாலைப்பகுதியிலும் பளைப் பகுதியிலும் நிறுத்தப்பட்டே குண்டு செயலிழக்க வைக்கும் பணி இடம்பெற்றது. இதன்போது பாரிய சத்தத்துடனும் அதிர்வுடனும் குண்டு வெடித்ததாக அயலில் உள்ள கிராம மக்கள் தெரிவித்தனர்.